(90)

(90)

முன்னலோர் வெள்ளிப் பெருமலைக் குட்டன் மொடுமொடு விரைந்தோட

பின்னைத் தொடர்ந்ததோர் கருமலைக் குட்டன் பெயர்ந்தடி யிடுவதுபோல்

பன்னி யுலகம் பரவியோ வாப்புகழ்ப் பலதே வனென்னும்

தன்நம்பி யோடப் பின்கூடச் செல்வான் தளர்நடை நடவானோ.

பதவுரை

முன்	–	முன்னே
நல்	–	அழகிய
ஓர்	–	ஒப்பற்ற
வெள்ளி பெருமலை	–	பெரிய வெள்ளிமலை பெற்ற
குட்டன்	–	குட்டி
மொடுமொடு	–	திடுதிடென்று
விரைந்து	–	வேகங்கொண்டு
ஓட	–	ஓடிக்கொண்டிருக்க,
பின்னை	–	(அந்தப் பிள்ளையின்) பின்னே
(தன் செருக்காலே அப்பிள்ளையைப் பிடிப்பதற்காக)
தொடர்ந்தது	–	தொடர்ந்ததுமாகிய
ஓர்	–	ஒப்பற்ற
கருமலை	–	கருநிறமான மலைபெற்ற
குட்டன்	–	குட்டி
பெயர்ந்து	–	தானிருக்குமிடத்தை விட்டுப் புறப்பட்டு
அடி இடுவது போல்	–	அடியிட்டுப் போவதுபோல, –
உலகம்	–	லோகமெல்லாங்கூடி
பன்னி	–	(தங்களாலான வரையிலும்) ஆராய்ந்து
பரவி	–	ஸ்தோத்ரஞ்செய்தும்
ஓவா	–	முடிவுகாணமுடியாத
புகழ்	–	கீர்த்தியையுடைய
பலதேவன் என்னும்	–	பலராமன் என்கிற
தன் நம்பி ஓட	–	தன்னுடைய தமையன் (முன்னே) ஓடிக்கொண்டிருக்க
பின் கூட செல்வான்	–	(அவனைப் பிடிக்க வேணுமென்ற எண்ணத்தினால் அவன்) பின்னே உடன் செல்பவனான இக் கண்ணபிரான்
தளர்நடை நடவானோ -.

ஸ்ரீ காஞ்சி பிரதிவாதி பயங்கரம் அண்ணங்கராசாரியார் எழுதிய

விளக்க உரை

*** – பலராமன் வெண்மை நிறமுள்ளவனாதலால், அவன் ஓடுதற்கு வெள்ளிமலையீன்ற குட்டியோடுவதையும், கண்ணன் கருநிறம் உள்ளவனாதலால் அவன் பின்னே தொடர்ந்தோடுதற்குக் கருமலையீன்ற குட்டி தொடர்ந்தோடுவதையும் உவமை குறித்தார்.  காரியம் காரணத்தை ஒத்திருக்கும் என்ற கொள்கையை அநுஸரித்து இங்ஙனருளிச் செய்தனரென்க.  நம்பி – ஆண்பாற் சிறப்புப்பெயர்.  இங்கு, தமையனென்ற பொருளைக்காட்டிற்று.  அன்றி, பலராமனுக்கு ‘தம்பி மூத்தபிரான்‘ என்று ஒரு பெயர் ஸம்ப்ரதாயத்தில் வழங்குதலால், அதன் ஏகதேசமாகிய ‘நம்பி‘ என்கிற வித்தால் அப்பெயர் முழுவதையும் குறித்தாருமாம்.  மொடுமொடு – நடக்கும்போது தோன்றும் ஒலிக்குறிப்பு;  விரைவுக்குறிப்புமாம்

English Translation

Like a boulder from a white mountain rumbling down with great speed and a boulder from a black mountain rolling behind it, a big brother called Baladeva, praised by the world without end, runs swiftly and the younger brother follows.  Is he going to come toddling now?