(2199)

(2199)

கொண்ட துலகம் குறளுருவாய்க் கோளரியாய்,

ஒண்டிற லோன் மார்வத் துகிர்வைத்தது – உண்டதுவும்

தான்கடந்த ஏழுலகே தாமரைக்கண் மாலொருநாள்,

வான்கடந்தான் செய்த வழக்கு.

 

பதவுரை

குறள்உரு ஆய்	–	வாமநரூபியாய் மாவலியிடஞ் சென்று யாசித்து
உலகம்	–	பூமி முதலிய லோகங்களை
கொண்டது	–	ஆக்ரமித்துக் கொண்டதும்,
கோள் அரி ஆய்	–	மிடுக்கையுடைய நரசிங்கமாகி
ஒண்திறலோன் மார்வத்து	–	மஹா பலசாலியான இரணியனுடைய மார்பிலே
உகிர் வைத்தது	–	தனது நகங்களையழுத்திக் கீண்டொழித்ததும்
ஒருநாள்	–	ஒருகாலத்திலே
தான் கடந்த	–	தான் அளந்து கொண்ட
ஏழ் உலகே	–	எல்லாவுலகங்களையும்
உண்டதுவும்	–	(பிரளயங் கொள்ளாதபடி) திருவயிற்றிலே வைத்துக் கொண்டதும்
(ஆகிய இச்செயல்கள்)
வான் கடந்தான்	–	ஆகாசத்தையளவிட்டாலும் அளவிடவொண்ணாதபடியுள்ள பெருமையையுடையவனும்
தாமரை கண்	–	செந்தாமரைக் கண்ணனுமாகிய
மால்	–	எம்பெருமான்
செய்த	–	செய்தருளின
வழக்கு	–	நியாயமான செயல்களாம்

 

ஸ்ரீ காஞ்சி பிரதிவாதி பயங்கரம் அண்ணங்கராசாரியார் எழுதிய

விளக்க உரை

***- ஸ்ரீமந் நாராயணனே ஸர்வஸமாகரயணீயனென்று கீழ்ப்பாட்டிற் கூறியதை நிலைகாட்டுதற்காக அப்பெருமான் தன்னை அழியுமாறியும் ஜகத்ரக்ஷணம் பண்ணுகிறபடியைப் பாருங்களென்கிறாரிதில் உலகத்தில் குள்ளனைக் கண்டால் கண்டவர்களும் ஏசிப் பேசுவது வழக்கம்; அப்படிப்பட்ட குள்ள வடிவைக் கொண்டான் இந்திரன் குறையைத் தீர்ப்பதற்காக அன்றியும் உடல் ஒருபடியும் முகம் ஒருபடியுமாக வடிவெடுப்பதும் பரிஹாஸாஸ்பதம்; அப்படிப்பட்ட வடிவையும் கொண்டான் மூவுலகங்களின் துயர் தொலைக்க.  அன்றியும் தன் காலிலேபட்ட வஸ்து அசுத்தமென்று அதை எவனும் உட்கொள்ளமாட்டான்; எம்பெருமானோ வென்னில், த்ரிவிக்ரமாவதாரத்தில் தன்னடிக் கீழ்ப்பட்ட உலகங்களையே (மற்றொரு கால் பிரளயங் கொள்ளாதபடி) உட்கொண்டான்.  ஆகவே இவ்வளவுஞ் செய்தது தன்னுடைமையைத் தான் நெருக்கிக் கொள்வதற்காகவே யாதலால் இவனே ஸர்வ ஸ்வாமியென்பது திண்ணமன்றோ.

“வான்கடந்தான் செய்தவழக்கு” என்ற ஈற்றடிக்கு இருவகையாகக் கருத்தாகலாம்; தன்னுடைய ரக்ஷகத்வத்தை நிலைநாட்டிக் கொள்ள வேண்டிச்செய்த காரியங்களாகையாலே இவையெல்லாம் நியாயமான காரியங்கள் என்பதாகவொரு கருத்து; இனி, வழக்கு என்றது எதிர்மறை இலக்கணையால் வழக்கல்ல என்றபடியாய், சிறிய வடிவைக் காட்டிப் பெரிய வடிவாலே உலகங்களை அளந்து கொள்வதும், உலகத்தில் எங்கும் என்றுங் கண்டறியாதவொரு விஜாதீயமான வடிவத்தையெடுத்து இரணியனைப் பிளந்தொழிப்பதும்; தன் காலில்பட்டு அசுத்தமான வுலகத்தைத்தானே உட்கொள்ளுதலும் நியாயமல்லவே!  என்றவாறாம்.  ப்ரேமத்தின் “கனத்தாலே” பக்தர்கள் இப்படி பரிஹாஸமுறையிலே பேசுவதும் பொருந்தும்.

வான் கடந்தான் = வானத்தை அளவிடிலும் அளவிட வொன்ணாத பெருமையை யுடையவனென்றும் ஸ்வர்க்கத்தை யளந்தவனென்றும் பொருளாகலாம்.

 

English Translation

A graceful manikin received the Earth; a fierce lion fore into Hiranya’s chest; a child swallowed the seven worlds, these are some of the wonders of my lotus-eyed Earth-stradding Lord.