(193)

(193)

கன்றுகள் இல்லம் புகுந்து கதறுகின் றபசு வெல்லாம்

நின்றொழிந் தேன்உன்னைக் கூவி நேசமே லொன்று மிலாதாய்

மன்றில்நல் லேல்அந்திப் போதுமதிள் திரு வெள்ளறை நின்றாய்

நின்றுகண் டாய்என்தன் சொல்லுநான் உன்னைக் காப்பிட வாராய்.

பதவுரை

மதிள்	–	மதிளரணையுடைய
திருவெள்ளறை	–	திருவெள்ளறையிலே
நின்றாய்	–	நின்றருளினவனே!
மேல்	–	(என்) மேல்
ஒன்றும்	–	துன்பமும்
நேசம் இலாதாய்	–	அன்பில்லாதவனே!
உன்னை கூவி	–	உன்னைக் கூவிக்கொண்டு
நின்றொழிந்தேன்	–	நின்று விட்டேன்;
(அதனால்)
பசு எல்லாம்	–	பசுக்களெல்லாம்
கன்றுகள் இல்லம் புகுந்து	–	கன்றுகளிருக்குமிடத்திலே சேர்ந்து
கதறுகின்ற	–	கத்துகின்றன;
(நீ)
அந்தி போது	–	அந்திவேளையில்
மன்றில்	–	நாற்சந்தியில்
நில்வேல்	–	நில்லாதே;
என தன் சொல்லு	–	என்னுடைய வார்த்தை
நன்று கண்டாய்	–	(உனக்கு) நல்லதாகுங்கிடாய்:
நான் உன்னை காப்பு இட வாராய்.

ஸ்ரீ காஞ்சி பிரதிவாதி பயங்கரம் அண்ணங்கராசாரியார் எழுதிய

விளக்க உரை

***- பசுக்களைக் கறக்க வேண்டிய நான் உன்னைக் காப்பிட அழைத்துக் கொண்டிருப்பதனால்! மேய வெளியே போயிருந்த பசுக்களெல்லாம் கன்றுகளுள்ளவிடத்தில் வந்து சேர்ந்தபின்பும் கறப்பாரில்லாமல் முலைக்கடுப்பெடுத்துக் கத்துகின்றன என்பது முதலடியின் கருத்து.  ‘கதறுகின்ற, என்பதை இடைநிலைத் தீபகமாக்கி, கன்றுகள் முலையுண்ணப் பெறாமையால் கத்துகின்றன; பசுக்கள் புறம்பேநின்று கொண்டு கன்றுகள் முலையூட்டுதல் கறத்தல் செய்யாமையாலே முலைக்கடுப்பாற் கதறுகின்றன என்றுமாம்.  ‘நேசமேல், என்றவிடத்தில், நேசம் ஏல் என்று பிரித்து ஏல் என்பதை அசைச்சொல்லாகவுங் கொள்வர்.  நேசம் – ‘ஸ்நேஹம், என்ற வடசொல் விகாரம்.

English Translation

O Loveless One! I stand here calling you while all the cows have gone to the pen and wait bellowing. Do not stand at the crossroads at dusk. Look, my rods are well-meant. O Lord who stands in the walled city of Vellarai, come, let me ward off the evil eye.