(1359)

(1359)

செறும்திண் திமிலே றுடைய, பின்னை

பெறும்தண் கோலம் பெற்றா ரூர்ப்போல்,

நறுந்தண் தீம்தே னுண்ட வண்டு,

குறிஞ்சி பாடும் கூட லூரே!

 

பதவுரை

செறும் திண்திமில் ஏறு	–	மேல் விழுவனவாய் திடமான முசுப்புக்களையுடையனவான ரிஷபங்கள்
உடைய	–	பங்கமடைய,
பின்னை பெறு தண் கோலம்	–	நப்பின்னைப் பிராட்டியினுடைய பெறுதற்கு விரும்பத்தகுந்ததான அழகிய திருமேனியை
பெற்றார்	–	(ஏறுதழுவி) மணஞ் செய்து கொண்ட பெருமானுடைய
ஊர்	–	திவ்யதேசம் (எதுவென்றால்)
நறு தண் தீம் தேன் உண்ட வண்டு	–	மணம்மிக்கதாய் குளிர்ந்ததாய் இனிமையான தேனைப் பருகின வண்டுகள்
குறிஞ்சி பாடும்	–	குறிஞ்சிப் பண்ணைப்பாடப் பெற்ற
கூடலூர்

 

ஸ்ரீ காஞ்சி பிரதிவாதி பயங்கரம் அண்ணங்கராசாரியார் எழுதிய

விளக்க உரை

***- ஏறு உடைய பின்னை = ரிஷபங்களை யுடையளான நப்பின்னை என்றதாகக் கொண்டு, ரிஷபங்களின் வலியடக்குதலைத் தனக்கு சுல்கமாகவுடைய நப்பின்னை என்னவுமாம்.

கோலம் – அழகுக்கும் உடம்புக்கும் பெயர்.

மூன்றாமடியில் ‘தண்டீன்’ என்று பலரும் ஓதுவது பொருந்தாது. ‘தண்டீம்’ என்றே ஓதுக.  தண் + தீம், தண்டீம்.  தீம் – இனிமை

 

English Translation

Krishna received the beautiful Nappinnal as a prize for his subduring the seven bulls in a fight, He resides in Kudalur where bees drink fragrant nectar and sing kurinji panns.