(3194)

(3194)

நம்பனை ஞாலம் படைத்தவ னைதிரு மார்பனை,

உம்பர் உலகினில் யார்க்கும் உணர்வரி யான்தன்னைக்,

கும்பிநரகர்கள் ஏத்துவ ரேலும் அவர்கண்டீர்,

எம்பல் பிறப்பிடை தோறெம் தொழுகுலம் தாங்களே.

 

பதவுரை

நம்பனை	–	நம்பப்படுமவனும்
ஞானம் படைத்தவனை	–	(தன்னை ஆச்ரயித்து அநுபவிக்கைக்குறுப்பாக) ஜகத்ஸ்ருஷ்டியைப் பண்ணுமவனும்
திருமார்பனை	–	பிராட்டியைத் திருமார்பிலே உடையவனும்
உம்பர் உலகினில்	–	மேலுலகங்களில்
யார்க்கும்	–	எப்படிப்பட்டவர்களுக்கும்
உணர்வு அரியான் தன்னை	–	அறியமுடியாத பெருமையையுடையவனுமான எம்பெருமானை
ஏத்துவர் கும்பிநரகர்கள் ஏலும்	–	துதிப்பவர்கள் கும்பியாக நரகவாஸத்திற்குரிய பாபிகளேயானாலும்
அவர் தாங்கள்	–	அவர்கள்
எம்	–	எமது
பல்	–	பலவகைப்பட்ட
பிறப்பு இடைதோறு	–	ஜன்மாவகாசந் தோறும்
எம் தொழுகுலம் கண்ணீர்	–	யாம் தொழும்படியான குலீகராவர்.

 

ஸ்ரீ காஞ்சி பிரதிவாதி பயங்கரம் அண்ணங்கராசாரியார் எழுதிய

விளக்க உரை

***-  அவனுடைய ஸகலஸம்பத்துக்கும் நிதானமான ச்ரியபதித்வத்தை அநுஸந்தித்து அதிலே யீடுபட்டிருக்குமவர்கள் குலம் குலமாக எனக்கு நாதர் என்கிறார். எப்படிப்பட்ட நிலைமையிலும் சேதநர்க்குத் தஞ்சமாக நம்பப்படுமவனாய், ஜகத்தையெல்லா முண்டாக்குவதுஞ் செய்து இந்நீர்மைக்கு அடியான ச்ரிய: பதித்வத்தை யுடையவனாய், மேலானவுலகங்களில் எத்தனையேனும் மேம்பாடுடைய பிரமன் முதலியோர்க்கும் உணரமுடியாதிருப்பவனுமான எம்பெருமானை ஏத்துமவர்கள் கும்பீபாக நரகத்திற்குச் செல்லுதற்குரிய பாவங்களைச் செய்தவர்களாயிருந்தாலும் அவர்கள் எமது தொழுகைக்கு உரிய சிறந்த குலத்திற் பிறந்தவர்களாகக் கொள்ளப்படுபவர்கள் என்றதாயிற்று.

கும்பிநரகர்கள் என்பதற்கு இரண்டுவகையாகப் பொருள் கூறுவதுண்டு; ஆறாயிரப்படியில் “கும்பீநரகயாதநாநுபவாநுகுண பாபங்களைப் பண்ணினாரேயாகிலும்” என்றருளிச் செய்திருக்கிறபடியே, கும்பீபாக நரகத்தில் துன்பங்களை யநுபவிததற்கீடான பாவங்களைச் செய்தவர் என்பது ஒரு பொருள்; இப்பொருளில், அவர்கள் இவ்வுலகத்திலேயே யுள்ளவர்கள் என்பது பெறப்படும். ‘கும்பீபாக நரகத்திலே கிடப்பவர்கள்’ என்பது மற்றொரு பொருள். “கும்பீபாகத்திலே து:க்காநுபவம் பண்ணா நிற்க. திருநாமத்தைச்சொல்லக் கூடுமாவென்னில்; க்லேசாதிசயத்தாலே அம்மே! அப்பா! என்னக்கூடாதோ வென்று காணும் இவர்க்கு நினைவு.” என்ற ஈட்டு ஸ்ரீஸூக்திகாண்க. “மஹாபாபபலமான கும்பீபாக நரகத்திலே கிடந்தும் அங்கே திருநாமத்தைச் சொல்லுவர்களாகில்” என்பது இரு பத்துநாலாயிரப்படி யருளிச்செயல். கும்பீபாக நரகத்திலுள்ளவர்களை ஆழ்வார் எங்ஙனே தொழக்கூடும்? என்று கேள்வி பிறக்கும்; அவர்கள் திருமார்பனை ஏத்தினார்களா இல்லையா என்பதை ஆழ்வார் எங்ஙனே தெரிந்துகொள்வது? என்றும் கேள்வி பிறக்கும்; பாகவதர் திறத்தில் ஆழ்வார்க்குள்ள ப்ரதிபத்தி விசேஷத்தைத் தெரிவிப்பது மாத்திரத்தில் விச்ராந்தமான இந்த வசநவ்யக்திகளில் கேள்வி கேட்கலாகாதென்பர் பெரியோர்.

 

English Translation

The trusted Lord who bears Lakshmi and the maker-of-the-worlds Brahma on his person is incomprehensible even to the great celestials.  Whoever praises him, even from the lowest kumbi hell, is my master through every life, just see!